კონკურს თანამედროვე გმირების გამარჯვებულების დაჯილდოება

ქართული ჯარის პოპულარიზაციისა და პატრიოტული სულისკვეთების გაზრდის მიზნით საქართველოს თავდაცვისა და განათლებისა და მეცნიერების სამინისტროებმა სკოლის მოსწავლეებისთვის ვიდეორგოლების კონკურსი „თანამედროვე გმირები“ ჩაატარეს. კონკურსში გამარჯვებული ბავშვებისა და მათი მასწავლებლების დაჯილდოების ცერემონიალი დავით აღმაშენებლის სახელობის საქართველოს ეროვნული თავდაცვის აკადემიაში გაიმართა.

გამარჯვებულებს გენერალ გიორგი მაზნიაშვილის წიგნები - „მოგონებანი 1917-1925“, დიპლომები და კომპიუტერული ტექნიკისა და აქსესუარების სასაჩუქრე ბარათები გენერალური შტაბის უფროსის მოადგილემ, პოლკოვნიკმა რომან ჯოხაძემ, განათლებისა და მეცნიერების მინისტრის მოადგილემ ლია გიგაურმა და ეროვნული თავდაცვის აკადემიის რექტორის მოვალეობის შემსრულებელმა, პოლკოვნიკმა მალხაზ მაკარაძემ გადასცეს.

ღონისძიებაზე გამარჯვებული ვიდეორგოლების ჩვენებაც გაიმართა. სამივე მათგანი 2008 წლის აგვისტოს ომის თემაზე მომზადდა. ბავშვებმა სამწუთიან კლიპებში ნათლად ასახეს აგვისტოს ომის გმირების მიმართ დამოკიდებულება, ქართველი თანამედროვე გმირების თავგანწირვა, ვაჟკაცობა და სამშობლოს სიყვარული.

კონკურსში გამარჯვება გორის N11 საჯარო სკოლის, თბილისის წმინდა კეთილმსახური მეფე თამარის სახელობის სკოლა-პანსიონისა და ლანჩხუთის მუნიციპალიტეტის სოფელ აკეთის საჯარო სკოლის მოსწავლეებმა მოიპოვეს. 
ღონისძიების დასასრულს აკადემიის რექტორმა და იუნკერებმა სტუმრებს აკადემიის ინფრასტრუქტურა დაათვალიერებინეს.

დამატებითი ინფორმაციისთვის:
ქვემოთ მოცემულ ბმულებზე შეგიძლიათ იხილოთ საქართველოს თავდაცვისა და განათლების სამინისტროების ერთობლივი კონკურსის „თანამედროვე გმირები“ გამარჯვებული ვიდეორგოლები:
I ადგილი - გორის N11 საჯარო სკოლის X კლასის მოსწავლეები ლიკა ვანიშვილი და ნათია მაზმიშვილი;
https://youtu.be/qSxYGB3Nna4

II ადგილი - წმინდა კეთილმსახური მეფე თამარის სახელობის სკოლა-პანსიონის XII კლასის მოსწავლეები თამარ სამხარაძე და საბა ამანათაშვილი;
https://youtu.be/9UJwUYj6jV0

III ადგილი - ლაჩხუთის მუნიციპალიტეტის სოფელ აკეთის საჯარო სკოლის მოსწავლეები მარიამ დოლიძე (X კლასი), ქეთევან აბაშიძე (X კლასი), გუგა ცინცაძე (XI კლასი) და ნიკა ჩხაიძე (X კლასი).
https://youtu.be/xhp6FNlQ83w